ຫໍສະໝຸດດິຈິຕອລໜັງສືໃບລານລາວ
ຫໍສະໝຸດດິຈິຕອລໜັງສືໃບລານລາວ ມີຮູບດິຈິຕອລ ຫຼາຍກວ່າ 12,000 ຕົ້ນສະບັບຕົວຂຽນ ຈາກທົ່ວປະເທດ ເພື່ອໃຫ້ຜູ້ສົນໃຈເຂົ້າຄົ້ນຄວ້າຢ່າງສະດວກສະບາຍ. ສະຖາບັນຮ່ວມມື ມີ ຫໍສະໝຸດແຫ່ງຊາດລາວ, ມະຫາວິທະຍາໄລ ປັສເຊົາ ແລະ ຫໍສະໝຸດແຫ່ງລັດ ປະຈຳກຸງແບັກແລັງ ໂຄງການນີ້ໄດ້ຮັບທຶນອຸປະຖຳຈາກມູນນິທິ ເພື່ອການຄົ້ນຄວ້າ ເຢຍຣະມັນ (DFG) ແລະ ກະຊວງການຮ່ວມມືທາງເສດຖະກິດ ແລະ ການພັດທະນາແຫ່ງ ສ.ສ. ເຢຍຣະມັນ (BMZ).
ຄັງຂໍ້ມູນຂອງຫໍສະໝຸດດິຈິຕອລນີ້ ປະກອບດ້ວຍໜັງສືໃບລານທີ່ມີເນື້ອໃນຢ່າງຫລາກຫລາຍແລະ ໄດ້ສຳຫລວດຄັດເລືອກມາຖ່າຍເປັນໄມໂຄຼຟີມໄວ້ ຈາກພື້ນທີ່ພູມສາດອັນກວ້າງຂວາງ ແມ່ນເປັນເອກະສານຈາກຫລາຍຍຸກຫລາຍສະໄໝ. ມີບົດວັນນະຄະດີຫລາຍຮູບແບບ ອັນໄດ້ລິດຈະນາຂີດຂຽນໂດຍຜູ້ຈານຈາກສຳນັກຕ່າງໆ ທັງໃຊ້ພາສາ ແລະ ຕົວອັກສອນຫລາກຫລາຍແຕກຕ່າງກັນ. ບົດເລື່ອງສ່ວນຫລາຍເປັນມູນມໍລະດົກວັນນະຄະດີຂອງລາວ, ລ້ານນາ ແລະ ໄທລື້ ນອກນັ້ນມີບົດວັນນະຄະດີຈຳນວນໜຶ່ງທີ່ໃຊ້ພາສາ ແລະ ອັກສອນໄທເໜືອ, ໄທດຳ ແລະ ອື່ນໆ.
ຖານຂໍ້ມູນຂອງຫໍສະໝຸດດິຈິຕອລນີ້ ສາມາດຄົ້ນຫາຊື່ເລື່ອງ, ຄຳສັບປະກອບຊື່ເລື່ອງ, ພາສາ, ຕົວອັກສອນ, ປະເພດເນື່ອຫາ, ວັດສະດຸຂີດຂຽນ, ບ່ອນເກັບມ້ຽນ, ປີລິດຈະນາ, ແລະ ເລກລະຫັດຂອງໜັງສື. ຜູ້ຊົມໃຊ້ຫໍສະໝຸດດິຈິຕອລນີ້ ສາມາດເບິ່ງຮູບໜັງສືໃບລານໄດ້ຫຼືກ່າຍສຳເນົາລົງໃນຄອມພິວເຕີ ໂດຍຜ່ານເວັບໄຊນີ້. ນອກຈາກນັ້ນຮູບຂອງບົດເລື່ອງຄົບຊຸດ ກໍ່ສາມາດດາວນ໌ໂລດໄດ້. ຮູບຂາວດຳເງົາສີເທົາຖ່າຍທອດມາຈາກໄມໂຄຼຟິມ ສ່ວນພາບສີນັ້ນໄດ້ຖ່າຍດ້ວຍກ້ອງດິຈິຕອລຈາກຕົ້ນສະບັບຕົວຈິງ.
ເວັບໄຊຂອງຫໍສະໝຸດດິຈິຕອລນີ້ ຍັງໄດ້ສະເໜີຂໍ້ມູນກ່ຽວກັບວັນນະຄະດີບູຮານລາວ, ໂຄງການປົກປັກຮັກສາໜັງສືໃບລານລາວ, ຂໍ້ມູນການຄົ້ນຄວ້າ, ນອກຈາກນັ້ນຍັງໄດ້ຮວບຮວມຮູບຖ່າຍຕ່າງໆ ທີ່ສະແດງເຖິງການເຮັດວຽກ ແລະ ບໍລິບົດຂອງໂຄງການປົກປັກຮັກສາໜັງສືໃບລານລາວ.
ຂ່າວໃໝ່
ເວັບໄຊຂອງຫໍສະໝຸດດິຈິຕອລໜັງສືໃບລານລາວ ໄດ້ເລີ່ມເປີດສະເໜີໃນອິນເຕີເນັດ ເມື່ອເດືອນກັນຍາ 2009. ໃນຂະນະນີ້ທ່ານສາມາດຄົ້ນຫາບົດເລື່ອງໄດ້ 12,168ເລື່ອງ. ທາງຫໍສະໝຸດດິຈິຕອລ ຍິນດີຮັບຄວາມຄິດເຫັນພ້ອມທັງຄຳຕິຊົມຂອງທ່ານ ໃນການຊົມໃຊ້ເວັບໄຊຂອງພວກເຮົາ.
ໃນເດືອນ ກັນຍາ 2011, ໄດ້ມີການເພີ່ມເຄື່ອງມືທົດລອງຄົ້ນຫາຄຳສັບ ຫຼືສ່ວນໃດສ່ວນໜຶ່ງພາຍໃນຮູບດິຈິຕອລ ຂອງບົດເລື່ອງຕ່າງໆລົງໃນໜ້າເຂົ້າສູ່ບົດເລື່ອງ.
ເລີ່ມຕັ້ງແຕ່ເດືອນມັງກອນ ປີ 2012 ມີການຖ່າຍໜັງສືໃບລານ ຂອງຫໍສະໝຸດແຫ່ງຊາດລາວ ດ້ວຍກ້ອງດິຈິຕອລ ເພື່ອໄດ້ເອົາຮູບສີເຫຼົ່ານີ້ຂຶ້ນຢູ່ເວັບໄຊແທນຮູບທີ່ຖ່າຍຈາກໄມໂຄຼຟິມ.
ຕິດຕໍ່ຫາພວກເຮົາ
ຫໍສະໝຸດດິຈິຕອລໜັງສືໃບລານລາວຫໍສະໝຸດແຫ່ງຊາດລາວ
ຖະໜົນ ເຊດຖາທິຣາດ,
ຕູ້ໄປສະນີ 8818,
ນະຄອນຫລວງວຽງຈັນ,
ສ.ປ.ປ.ລາວ
ໂທລະສັບ/ໂທລະສານ : +856 (0)21 26 46 56
ອີເມລ: laomanuscripts@gmail.com
Staatsbibliothek zu Berlin
Ostasienabteilung
Potsdamer Straße 33
10785 Berlin
ໂທລະສັບ: +49 30 266 436001
ໂທລະສານ: +49 30 266 336001
ostasienabteilung@sbb.spk-berlin.de